90 ГОДИНИ

ГРИЖА ЗА ЗАЕДНИЦАТА

Со 15 работници кои произведувале околу 350 kg фармацевтски суровини се поставени темелите на „Алкалоид“, како зачетоци на новата фармацевтска индустриска гранка во регионот.

По национализацијата во 1945 година, „Алкалоид“ влегува во фаза на континуиран раст, значително ги зголемува производството и бројот на вработените и ги проширува своите капацитети.

Со пуштањето во употреба на Галенскиот погон во 1957 година, „Алкалоид“ започнува производство на готови лекови и се афирмира како современа фармацевтска компанија со меѓународна соработка. Во погонот се произведуваат лекови во различни фармацевтски форми, меѓу кои и познатиот „Кафетин“.

Со интеграцијата на Билка, Фабриката за производство на хемикалии и фотоматеријали „Лафома“ и Фабриката за сапуни и козметика „Цветан Димов“ и со отворањето на новата фабрика за готови лекови во 1972 година, „Алкалоид“ се позиционира како целосно модерна фармацевтска индустрија.

Преку силен инвестициски циклус, нови фабрики и интеграции, „Алкалоид“ се позиционира меѓу петте најголеми компании од ваков тип во поранешна Југославија со значително проширениот асортиман, повеќе од 2.800 вработени и со воведувањето на еден од најпрепознатливите брендови на компанијата – Бекутан.

„Алкалоид“ успешно се трансформираше во акционерско друштво и остана една од ретките компании во државата која успеа да го задржи позитивниот тренд на раст и развој. Друштвото и стратешки го реализираше најзначајниот потег – трансфер во современиот извозно ориентиран систем со отворањето сестрински компании надвор од границите на државата.

Во 1996 година „Алкалоид“ го започнува најкрупниот инвестициски циклус. Со почетокот на изградбата на новата фабрика за цврсти таблетни форми на површина од околу 12.000 m2, преку воведувањето на GMP и ISO- стандардите и силната извозна ориентација, „Алкалоид“ се верификува како европски конкурентна фармацевтска компанија присутна на светските пазари.

„Алкалоид“ спроведува силна модернизација со воведувањето на системот SAP ERP и со отворањето на Центарот за информатичка технологија „Трајче Мукаетов“, а во 2009 година со работа започнува и новиот Институт за истражување и развој. Компанијата го отвора првиот производствен погон надвор од земјата и воспоставува стратешки партнерства со водечки светски компании.

Период обележан со интензивни капитални инвестиции во производствени и контролни капацитети, нови лаборатории и во современи погони. „Алкалоид“ ги зајакнува извозната ориентација, технолошката ефикасност и одржливиот развој преку континуирано вложување во квалитетот, едукацијата и во општествената одговорност.