28 фев. 2013 г.

„Алкалоид“ со донација за децата кои користеа бесплатен одмор

Водејќи се од начелото дека секое дете заслужува еднаква грижа од страна на општеството, „Алкалоид АД – Скопје“ на иницијатива на Министерството за труд и социјална политика на Република Македонија зеде учество во проектот „Користење бесплатна услуга за одмор и за рекреација на деца од семејства со социјален ризик и на деца корисници на посебен додаток“.

Во рамките на проектот, преку кој 3 000 деца од Македонија беа на бесплатен летен или зимски одмор, „Алкалоид“ донираше заштитни средства за сончање.

Министерот за труд и социјална политика, г. Спиро Ристовски, упати благодарност до генералниот директор на „Алкалоид“, г. Живко Мукаетов, за хуманоста и за безрезервната поддршка на децата кои имаат најголема потреба од тоа.

„Ја изразувам мојата лична благодарност до целиот тим којшто работеше на реализацијата на овој проект. Благодарност и до компанијата Алкалоид АД – Скопје, којашто им обезбеди донација од заштитни средства на дечињата кои ја користеа услугата за време на летниот период“, истакна министерот Ристовски.

Покрај „Алкалоид“, во проектот учествуваа и „Црвениот крст“ на град Скопје, „Агенцијата за управување со одземен имот“ и компанијата „ЕВН Македонија“.