28 фев. 2013 г.

„Алкалоид“ со две плакети од стопанската комора на Македонија за значајни инвестициски активности

Во рамките на одбележувањето на 91-годишнина од основањето на Стопанската комора на Македонија, која годинава посвети посебно внимание на компаниите и на менаџерите, кои во кризниот период од 2008 година до денес биле храбри да инвестираат, „Алкалоид“ доби плакета како признание за инвестициските активности во странство и плакета како признание за инвестициските активности за нови производни капацитети во Македонија во услови на криза.

И покрај кризата со којашто се соочи светската економија во изминативе четири години, „Алкалоид“ не стагнираше со инвестиции во своите деловни операции во земјава и во странство. Од 2008 година па наваму, „Алкалоид“ во македонски рамки реализираше инвестиции во износ од близу 19 милиони евра, главно наменети за модернизација на техничко-технолошките процеси и капацитети, за изградба и за опремување на нов институт за развој и контрола на квалитет, а значајни средства се вложени и во делот на информатичката инфраструктура на компанијата. Покрај инвестициите дома, „Алкалоид“ вложи и над 2 милиони евра за отворање на првиот производен капацитет надвор од Македонија, во Р. Србија, и во деловните операции во Србија, Словенија, Украина и во Русија.

На пригодната свеченост по повод официјалното одбележување на 91-годишнина од формирањето на Стопанската комора на Македонија и доделувањето на плакетите на „Алкалоид АД – Скопје“, генералниот директор и претседател на УО на компанијата, г. Живко Мукаетов, најави потенцијално отворање на канцеларии на компанијата во Р. Турција, Чешка и во Словачка.

„Македонските компании имаат потенцијал да инвестираат во странство, но потребно е познавање на пазарите бидејќи секој има своја специфика. Доколку се соберат вистинските информации, луѓе и знаења, се отвораат можностите за инвестирање. Тоа е она што на крајот на денот секогаш носи успех“, истакна Мукаетов во своето обраќање.