Посетете ја вашата локална Алкалоид веб страница

Денеска се одржа прес-конференција на Македонија2025 на која беше промовиран планот за просперитет „Една визија за забрзан раст“, поставен на 3 фундаментални области: дигитализација, конкурентност и олеснување на процесите за дијаспората, иселениците и туристите.

Генералниот директор на „Алкалоид“ АД Скопје и член на Одборот на директори на Македонија2025, г. Живко Мукаетов, потенцираше дека клучен фактор за исполнување на целта за годишен раст на БДП од над 5 % е зголемувањето на извозот на македонските компании. Апелираше дека е потребнa похрабра и издржана системска и систематска поддршка co намалување на непотребниот бирократски товар и олеснување на регулативите.

 „Македонија е мал пазар, со бројни успешни приказни кои вреди да се раскажат и надвор од границите на државава. Треба квалитетен производ кој може да се диференцира, кој има конкурентска предност и додадена вредност. Потребно е знаење и вештини, квалитетен и добро обучен кадар, инвестирање во истражување, развој и нови технологии, исполнување на стандардите за заштита на животната околина и системска поддршка - пред сè - во насока на мерлива и транспаретна програма за извозно ориентираните компании, која на крај на денот би го мерела ефектот од секој вложен денар во поддршка на извозните активности. “, истакна г. Мукаетов.

На настанот присуствуваа и г-ѓа Никица Мојсоска-Блажевски, Извршен директор на организацијата, и други членови на Одборот на директори: г. Виктор Мизо, г. Васко Кроневски, г. Ѓорѓе Војновиќ и г. Боријан Борозанов. Преку онлајн врска на настанот се обрати и еден од основачите на Македонија2025, г. Мајк Зафировски.