Посетете ја вашата локална Алкалоид веб страница

Живко Мукаетов

Генерален директор / Претседател на Управниот одбор на „Алкалоид“ АД

Од 2005 година наваму „Алкалоид“ бележи просечна стапка на раст од 12,4 %, што резултираше со петкратен раст на компанијата во овој период. Годината 2023 ја завршивме со вкупен промет од 268,3 милиони евра. Во фармацевтската индустрија пласманите обично се правопропорционални со инвестициите, вештините и со знаењето, кои изминативе две децении ги насочивме кон градење модерно и конкурентно производствено портфолио. Во последните 15 години „Алкалоид“ реализираше голем број инвестициски проекти, во вредност од 220 милиони евра, и планираме да останеме цврсто на овој пат и во иднина.

РЕЗУЛТАТИ

Иднината на глобалната економија сѐ уште е под влијание на воените, енергетските и на логистичките несигурности, а стапките на инфлација значително се одразуваат врз сите сегменти од деловното работење. Во нашиот случај тоа наметна непредвидени расходи, и покрај фактот дека фармацевтските производи припаѓаат на строго ценовно регулирана категорија на производи, па затоа повеќето од цените се замрзнати. Во вакви несигурни времиња го подигнавме нивото на претпазливост, секојпат настојувајќи максимално да ги оптимизираме процесите во компанијата.

И покрај сите предизвици, „Алкалоид“ успеа да создаде позитивни финансиски резултати во своето работење, надминувајќи го планираното.

Остваривме вкупна консолидирана продажба од 16.512.977.886 денари, што претставува раст од 16 %, додека, пак, нашата консолидирана нето-добивка изнесува 1.576.864.006 денари, што претставува раст од 8 % во однос на 2022 година.

Од продажбата 31 % е реализиран на домашниот пазар, додека, пак, 69 % од извоз, од кои 28 % на пазарите на ЈИЕ, 22 % на западноевропските пазари, 17 % на источните пазари, а 1 % на другите пазари. Најголем пораст е остварен на западноевропските пазари (25 %) и на пазарите во Источна Европа (раст од 23 %).Тука сакам да го истакнам примерот на Романија, каде што остваривме пласман во вредност од 10,3 милиони евра, што претставува раст од 71 % споредено со 2022 година, кога, всушност, ја отворивме нашата подружница во Букурешт. Со ова уште еднаш се потврди исправноста на одлуката „Алкалоид“ да основа свој правен субјект и тим на овој пазар.

Од вкупните продажби 90 % се реализирани во сегментот фармација, додека, пак, 10 % се во сегментите хемија, козметика и билкарство.

БЕРЗАНСКО РАБОТЕЊЕ

Со приближно 5.500 мали акционери „Алкалоид“ е компанија со најголем број поединечни акционери на Македонската берза. Акциите на „Алкалоид“ се меѓу трите најтргувани и најликвидни акции на македонскиот берзански пазар.

Во редовното берзанско работење „Алкалоид“ АД Скопје учествуваше со истргувани 513,5 милиони денари, што претставува 18,67 % од вкупниот промет остварен на првиот официјален пазар на Берзата во 2023 година. Цената на акцијата на „Алкалоид“ АД Скопје се движеше од 17.199 до 18.500 денари, со просечни 17.781,93 денари. Пазарната капитализација на „Алкалоид“ АД Скопје на крајот на 2023 година изнесуваше 25.985.569.606 денари. Во 2023 година, по единаесетти пат, „Алкалоид“ беше добитник на престижното признание од Македонската берза за најтранспарентно котирано акционерско друштво. „Алкалоид“ се здоби и со уште една награда – Акција на годината за 2023 година – врз основа на јавната анкета организирана од Македонската берза и од веб-порталот „Фактор“.

ИНВЕСТИЦИИ 

Под специфични околности, во 2023 година продолживме со нашите инвестиции издвојувајќи 1.741.562.000 денари за зголемување и за диверзификација на нашите производствени капацитети.

Во делот на инвестициите би го потенцирал нашиот мегапроект „Таблетно 2“, завршен во последниот квартал од 2023 година, кој овозможува двојно зголемување на капацитетот на производството на цврсти дозирани форми: таблети, филм-обложени таблети, капсули и двојно обложени таблети, воведени како производствена технологија за првпат во нашата земја. „Алкалоид“ има два модела на деловно работење: со сопствено портфолио, т.н. сегмент business to customer, и сегментот business to business, според кој работиме со outlicence. Оттаму, ни беше јасно дека со поголем обем на производство, а истовремено со помалку анализи на секоја помала серија, би биле многу поконкурентни.

Како примарно генеричка компанија, нашата цел е да се издвоиме преку производите со додадена вредност. Нашиот прв иновативен производ, за кој компанијата доби меѓународен патент за Value Added Medicine (VAM), течниот Омепразол, ја потенцира посветеноста на „Алкалоид“ кон извонредни достигнувања во фармацевтската сфера, претставувајќи новина во производството на генерички лекови преку иновации, диференцирање на пазарот и преку создавање лекови за задоволување на потребите на специфичните групи пациенти.

Регистриравме три нови капитално поврзани друштва: АЛКАЛОИД СЕЕ ДОО Белград – трета подружница на компанијата на српскиот пазар;

АЛКАЛОИД ФАРМА ИНТЕРНАЦИОНАЛ ДОО Загреб – втор правен субјект во Хрватска и осми по ред основан во рамките на земјите членки на Европската Унија – и АЛКАЛОИД КАЗАХСТАН ДОО, со седиште во Алмати, нашата прва подружница во Азија.

Во служба на квалитетна едукација и на продуцирање идни здравствени работници, го зголемивме бројот на средношколци и на студенти вклучени во тековните програми за дуално образование и за пракса, а Фондацијата „Трајче Мукаетов“ ги продолжи своите програмски активности. До денес Фондацијата има стипендирано 659 студенти, а врз основа на стипендиите и на еднократните парични награди за првенците на генерации по медицина и по фармација „Алкалоид“ преку Фондацијата инвестираше приближно 132 милиони денари.

Во духот на корпоративната општествена одговорност беше и јубилејот на нашиот водечки бренд за детска козметика „Бекутан“. По повод одбележувањето на 45-годишнината, компанијата донираше речиси 2 милиони денари за македонската подружница на меѓународната организација „СОС Детско Село“.

ИДНИНА

На прагот на третиот милениум, кога технологијата и вештачката интелигенција се лесно достапни, научивме уште повеќе да го цениме човечкиот потенцијал. Човечките ресурси отсекогаш биле во фокусот на „Алкалоид“. Нашиот императив е да поттикнеме средина во која луѓето ќе бидат задоволни и ќе го вложуваат својот потенцијал во нашиот заеднички успех. Наследивме успешна приказна од претходната генерација и ја пренесовме глобално, работејќи посветено и создавајќи за идните генерации. Преку нашето континуирано транспарентно и етичко работење продолжуваме со нашите зложби за одржлив раст.