25 септ. 2015 г.

Претставници на AMCHAM во официјална посета на „Алкалоид“

Делегација од Американската Стопанска Комора (AmCham), предводена од директорите на организациите во Македонија, Косово, Албанија и Црна Гора, оствари официјална работна посета на „Алкалоид АД“ Скопје на 17-ти септември годинава.

Извршните директори на AmCham во овие четири држави: г-ѓа Мишел Османли - Македонија, г. Ариан Зека - Косово, г. Лоренц Ѓони - Албанија и г-ѓа Милица Драгојевиќ - Црна Гора, ја посетија компанијата со цел запознавање со резултатите од работењето, нејзините пласмани и производственото портфолио.

„Алкалоид“ е член на Американската Стопанска Комора во Македонија од 2000-та година, и како компанија има долгогодишна, успешна соработка со Соединетите Американски Држави, каде во 2006 година основаше и своја подружница, „Алкалоид УСА“ со седиште во Њу Олбани, Охајо. На ваквиот деловен потег му претходеше успешната деловно-техничка соработка со реномирани компании од САД, како Фајзер од Њујорк и Мерк Шарп и Дом (MSD), трасирани во далечната 1956 година.

Во моментов, „Алкалоид“ во своето потрфолио има неколку лекови кои се произведуваат под лиценца на реномирани американски фармацевтски куќи, како и маркетиншки авторизации за застапство на фармацевтски препарати од американски производители во Македонија. Од деловните потфати во САД, особена гордост за „Алкалоид“ е патентирањето на технологијата за производство на лекот ,,Новаморф“ во 2003 година, како и интензивната соработка со реномираната ,,АВЕДА“, членка на групацијата „Исти Лаудер“ во делот на производство на органски чаеви, која започна во 2005 година и сè уште успешно функционира. Во сегментот билкарство, во 2011 година ,,Алкалоид“ трасираше успешна соработка со уште две американски компании „Арбон Интернационал“ и ,,Свансон“ специјализирани за производство и дистрибуција на чаеви и природни лековити производи.