Ние ги обезбедуваме нашите потрошувачи и клиенти со висококвалитетни производи, кои се клинички тестирани и кои ги исполнуваат најсовремените и најстрогите светски стандарди. Нудиме гаранција со нашата посветеност, со нашиот углед, со високите стандарди и со сертификатите што ги поседуваме. Нашата организациска структура ни овозможува да ги слушнеме и да одговориме на најчувствителните потреби на нашите клиенти.

Функционирањето со нашите клиенти се одвива во согласност со високите стандарди за развој, сплотувајќи ги заедничките квалитети во одлична соработка. Секоја година имаме панел-средби и дискусии (brainstorming-сесии) со доставувачите, со цел да се подобри секој сегмент од нашите релации.

Ние ги охрабруваме и ги препознаваме континуираното подобрување, иновациите во секој сегмент, прагматичното размислување и дејствување, како и континуираната едукација. Инвестираме во нашите луѓе и во подобрувањето на нивните вештини. Со тоа инвестираме во нивната иднина и во иднината на нашата компанија. За таа цел го реконструиравме и целосно го опремивме нашиот едукативен центар во Дојран, РС Македонија.

Ние постојано ги подобруваме работните услови, придобивките за нашите вработени и системот за наградување. Но истовремено се фокусираме и на подобрување на нашата ефикасност и на нашиот систем во целост. Добитници сме на плакета од Македонската асоцијација за безбедност и здравје при работа, доделена за компанијата како најбезбеден работодавец за 2009 година. Ние се грижиме да се одржиме како бренд и како работодавец и на тој начин да сме претставени од своите вработени во најдобро светло.

„Не постои поголем приоритет од високопрофесионален и етичен однос на нашите вработени, од која било земја да потекнуваат и на која било позиција да работат. Ние постоиме за исполнување на нашата мисија и визија и секој вработен со своето однесување треба да ја манифестира својата цврста намера и подготвеност да придонесе за нивно поуспешно остварување“, истакна нашиот генерален директор / претседател на УО, г. Живко Мукаетов, во своето обраќање до вработените во „Алкалоид“ АД во Кодот на етично и на бизнис-однесување во октомври 2009 година и додаде: „Кодот на етично и на бизнис-однесување не претставува нешто што почнуваме да го практикуваме при вработувањето во ‘Алкалоид’ АД или нешто што го практикуваме кога ќе имаме доволно време за тоа. Кодот треба да претставува показател за тоа што правиме и како се однесуваме во секоја минута и во секој момент од денот“.

Започнувајќи од академската 2007/2008 година, па сѐ до овој момент, Фондацијата „Трајче Мукаетов“ учествуваше во спонзорирањето на 579 студенти од Фармацевтскиот и од Медицинскиот факултет при Универзитетот „Св. Кирил и Методиј“. По своето дипломирање тие имаат шанса да ја градат својата кариера во „Алкалоид“ АД.

Ние ги поддржуваме и придонесуваме за успешната работа на голем број македонски и странски комори, асоцијации и организации. „Алкалоид“ АД е докажан поддржувач и на македонскиот спорт и на македонските репрезентации во ракомет, одбојка и во кошарка. Шаховскиот тим на „Алкалоид“ АД гордо го претставува македонското знаме. Дополнително, активно ја поддржуваме и културата преку овозможување врвни услови за творење на нашите истакнати уметници.

Некои од инволвираните страни со кои имаме соработувано во изминативе години

·        Американска стопанска комора (AmCham)

·        Фармацевтска комора

·        Стопанска комора на Македонија

·        Комора за економија

·        Министерство за животна средина и просторно планирање на РС Македонија

·        Фонд за здравство на РС Македонија

·        Светска банка

·        Европска банка за реконструкција и за развој (EBRD)

·        Светска здравствена организација (WHO)

·        Меѓународна финансиска корпорација (IFC)

·        Американска агенција за интернационален развој (USAID)

·        Интернационален детски фонд за итни случаи на Обединетите нации (UNICEF)

·        Универзитет „Св. Кирил и Методиј“ – Скопје:

                - Фармацевтски факултет

                - Природно-математички факултет – Институт за хемија

                - Медицински факултет

                - Факултет за електротехника и информациски технологии

                - Машински факултет

·        Универзитет „ФОН“ – Скопје

·        Европски универзитет – Скопје

·        Универзитет за економија – Љубљана

·        Македонска шаховска федерација

·        Македонска одбојкарска федерација

·        Македонска кошаркарска федерација

·        Македонска ракометна федерација

Нашиот бизнис-пристап е да се работи на транспарентен и на етичен начин.

Ние комуницираме со своите акционери и со јавноста и ги информираме точно, прецизно и навремено за секое важно прашање. Се грижиме за зголемување на вредноста на нашите акционери преку амбициозен, реален и оправдан развој, со намалување на ризикот и со подобрување на уделот на пазарот, внатрешната ефикасност и на процесот на бизнис-планирање.

Во изминатите две децении имаме инвестирано речиси 200 милиони евра во производствени капацитети, во делот за истражување и развој и за контрола на квалитет, во магацини, како и во софтверски и ERP-решенија, а сето тоа во согласност со cGMP-стандардите.

Низ годините бевме 9-пати наградени од Македонската берза како најтранспарентна компанија. Нашите над 5.000 акционери, од кои околу 2,3 % се странски инвеститори, ги добиваат своите дивиденди секоја година, со речиси двоцифрен пораст од година в година. Како корпорација ние сме посветени на континуиран развој, стремејќи се да ја исполниме нашата мисија и визија на најпрофесионален начин.

Нашиот генерален директор/претседател на УО, г. Живко Мукаетов, би рекол:

„И покрај тешкотиите, мора да го продолжиме трендот на раст на ‘Алкалоид’ АД и да продолжиме да бидеме добрата вест од Македонија“.